Dwarna
“Insaħħu il-Vuċi tat-Tfal f’Malta” huwa proġett ko-finanzjat mill-Programm tal-UE għaċ-Ċittadini, Ugwaljanza, Drittijiet u Valuri (CERV). Il-proġett għandu l-għan li jtejjeb il-parteċipazzjoni tat-tfal, jippermettilhom jesprimu l- fehmiet tagħhom liberament u jinfluwenzaw kwalunkwe deċiżjoni li se taffettwahom.
Dan il-proġett qed jiġi implimentat mill-Ministeru għall-Politika Soċjali u Drittijiet tat-Tfal (MSPC) b’kollaborazzjoni mal-University College Cork (UCC) u l-Kummissarju għat-Tfal f’Malta (CFC).
Għanijiet tal-Proġett
Ir-riżultati li dan il-proġett qed jimmira għalihom jinkludu titjib fil-kwalità tal- ħajja għat-tfal kollha f’Malta, opportunitajiet aħjar għat-tkabbir u l-iżvilupp tagħhom, u t-tisħiħ tal-parteċipazzjoni u l-vuċi tagħhom fi kwistjonijiet ta’ importanza nazzjonali. Il-proġett se jinvolvi lit-tfal f’kull pass u se jiġi implimentat b’konsultazzjoni sħiħa mat-tfal fl-istadji kollha tiegħu.
Il-Proġett “Insaħħu il-Vuċi tat-Tfal f’Malta” għandu 3 għanijiet ewlenin:
- L-iżvilupp ta’ pjattaforma ta’ parteċipazzjoni tat-tfal onlajn, disponibbli bħala website u app (Empowering Children App). Din il-pjattaforma se tipprovdi spazju sikur, inklużiv u sinifikanti għat-tfal biex jaqsmu l-ħsibijiet u l-ideat tagħhom u biex jipparteċipaw fit-tfassil tal-politika nazzjonali.
Jipprovdi għajnuna professjonali permezz ta’ chat iddedikat. L-Empowering Children App se tipprovdi wkoll appoġġ lit-tfal l-aktar vulnerabbli li jesperjenzaw kwalunkwe forma ta’ esklużjoni soċjali, abbuż, negliġenza, u/jew diffikultajiet psikoloġiċi u li huma fil-bżonn ta’ appoġġ emozzjonali, morali u soċjali.
- Il-bini tal-kapaċità ta’ dawk li jfasslu l-politika biex jintegraw u jtejbu l-parteċipazzjoni tat-tfal fit-teħid tad-deċiżjonijiet. Dan se jinkludi wkoll il-ħolqien ta’ Toolkit uniku għall-Evalwazzjoni tal-Politika tat-Tfal, biex jintuża f’Malta u potenzjalment ukoll f’pajjiżi oħra.
- Titqajjem kuxjenza permezz ta’ kampanja ta’ għarfien dwar id-dritt tat- tfal li jipparteċipaw u jinstemgħu.
Impatt
Il-proġett se jsaħħaħ l-iżvilupp personali tat-tfal, il-kunfidenza fihom infushom, u l-ħila għal-ħsieb kritiku li jwassal għal involviment akbar fi kwistjonijiet soċjetali, ċiviċi u politiċi.
Kampanja ta’ għarfien se teduka lill-partijiet interessati, inklużi t-tfal, dawk li jfasslu l-politika, il-ġenituri u l-edukaturi, trawwem fehim u implimentazzjoni aħjar tal-parteċipazzjoni tat-tfal.
Il-proġett se jipprovdi l-ħiliet meħtieġa lill-uffiċjali pubbliċi biex jinkorporaw il-parteċipazzjoni tat-tfal fit-tfassil tal-politika, kif ukoll it-tisħiħ tal-kapaċità tagħhom li jappoġġaw, jimmonitorjaw, u jevalwaw il-parteċipazzjoni tat-tfal.
Il-ħolqien ta’ Mekkaniżmu ta’ Parteċipazzjoni tat-Tfal online se jippermetti parteċipazzjoni tat-tfal b’ mod sistematiku u sinifikanti, u jipprovdi spazju biex it-tfal jesprimu l-opinjonijiet tagħhom dwar kwistjonijiet rilevanti għalihom.
It-Toolkit għall-Evalwazzjoni tal-Parteċipazzjoni tat-Tfal se jsaħħaħ il-kapaċità tal-beneficjarji ta’ dan il-proġett biex jevalwaw u jtejbu l-politiki tal-parteċipazzjoni tat-tfal, u jikkontribwixxi għal politiki aħjar kemm fil-livell nazzjonali kif ukoll f’dak internazzjonali.
Il-proġett jallinja mar-rakkomandazzjonijiet tal-Kummissjoni Ewropea biex jiġu stabbiliti u mtejba mekkaniżmi ta’ parteċipazzjoni tat-tfal u jiżdied l-għarfien dwar id-drittijiet tat-tfal permezz ta’ kampanji u taħriġ.
Il-Proġett Insaħħu il-Vuċi tat-Tfal f’Malta – impenn dejjiemi biex tingħata s-setgħa lit-tfal u jagħmlu l-vuċi tagħhom issir realtà.
Is-Servizz Online Kellimni.com
Kellimni.com hija pjattaforma 24/7 online sigura mmirata lejn nies li jeħtieġu appoġġ emozzjonali minn tim professjonali. Fuq Kellimni.com jistgħu jħossuhom sikuri biex jiftħu qalbhom dwar it-tħassib tagħhom permezz ta’ mezz li jafu u jifhmu, u fejn jistgħu jħossuhom li mhumiex waħedhom u li hemm xi ħadd li jimpurtah minnhom, u jimpurtah li ħajjithom tkun ħielsa mill-uġigħ u l-biża’. Fuq Kellimni.com aħna lesti li nisimgħu u nipprovdu assistenza billi nadottaw approċċ anonimu u kunfidenzjali.
In-natura tal-pjattaforma online tfisser li hija aċċessibbli għal kulħadd irrispettivament mill-pożizzjoni ekonomika jew soċjali tagħhom. Kellimni.com jilħaq nies li huma miċħuda mid-drittjiet tagħhom – partikolarment persuni li qed jesperjenzaw abbuż jew negliġenza, individwi b’kapaċità differenti; nies li l-familji tagħhom huma fi kriżi; nies li qed jiġu bullied minn sħabhom jew superjuri tagħhom; nies bi problemi ta’ dipendenza; persuni li qed jiġu diskriminati fuq bażi ta’ raġunijiet reliġjużi, razzjali jew sesswali; u dawk f’kunflitt mal-liġi.
Inħeġġu lill-persuna tesprimi t-tħassib tagħha u titkellem dwar il-kwistjonijiet li jolqtuha direttament. Kellimni.com joffri pjattaforma li permezz tagħha jiġu indirizzati l-ħtiġijiet u d-drittjiet li ġejjin tal-utent tas-servizz:
- Dritt li ssemmgħa t-tħassib tiegħek.
- Dritt li tirrealizza d-drittijiet tiegħek.
- Dritt li tkun mismugħ b’mod sigur u kunfidenzjali, u bla ġudizzju.
- Ħteġa li tfittex appoġġ minn individwi kwalifikati.
- Ħtieġa li tfittex informazzjoni dwar servizzi oħra disponibbli.
- Ħtieġa li tirċievi appoġġ u informazzjoni fil-ħin.
Is-servizz Kellimni.com joffri wkoll sezzjoni ta’ informazzjoni fuq il-website tiegħu fejn hemm bosta suġġetti relatati ma’ kwistjonijiet li n-nies jistgħu jkunu qed jesperjenzaw. Dawn huma aċċessibbli għal dawk li forsi ma jridux ikollhom aċċess għal appoġġ attiv iżda jistgħu jkunu qed ifittxu informazzjoni dwar kwistjoni li taffettwahom.
